काठमाडौँ, पुस १८ गते । नेपाली कांग्रेस अन्तर्गत नेपाल लोकतान्त्रिक खेलकुद संघ महाधिवेशन निर्देशन समीतिको आयोजनामा माघ १० गतेदेखि सभापति कप फुटबल हुने भएको छ ।
प्रतियोगितामा ‘ए’ डिभिजन क्लबका आठ र आमन्त्रित दुई विदेशी टोलीसहित १० टोलीको सहभागिता रहने बिहीबार कांग्रेस पार्टी कार्यालय सानेपामा आयोजित पत्रकार सम्मेलनमा प्रतियोगिता आयोजक समितिका संयोजक मोहनबहादुर बस्नेतले जानकारी दिनुभयो ।
माघ १० गतेसम्म चल्ने प्रतियोगिताको विजेता टोलीलाई २६ लाख र उपविजेता टोलीलाई १३ लाख रुपियाँ पुरस्कार प्रदान गरिनेछ । अखिल नेपाल फुटबल सङ्घ (एन्फा) को प्राविधिक सहयोगमा सञ्चालन हुने प्रतियोगिता त्रिपुरेश्वरस्थित दशरथ रङ्गशालामा हुनेछ ।
यस्तै समितिकै आयोजनामा दुर्गादत्त जोशी स्मृति राष्ट्रिय तेक्वान्दो प्रतियोगिता माघ १८ गतेदेखि कैलालीको धनगढीमा हुने जानकारी दिइयो । तीनदिने प्रतियोगिताको सिनियर र जुनियरतर्फ क्योरागीमा २० र पुम्सेमा ६ गरी २६ स्पर्धामा खेल हुने आयोजकले जनाएको छ ।
