१९ पुस, नुवाकोट । सम्पादक समाज नेपालले ‘गोविन्द वियोगी विशेष पत्रकारिता पुरस्कार’ नुवाकोट जिल्लामा क्रियाशिल पत्रकार ध्रुवकुमार रावललाई प्रदान गर्ने निर्णय गरेको छ।
लामो समयदेखि नुवाकोट जिल्लाबाट पत्रकारिता गर्दै आउनु भएका वा रावल नेपाल पत्रकार महासंघका निवर्तमान केन्द्रीय सदस्य समेत हुनुहुन्छ । हाल नुवाकोटबाट प्रकाशन हुने यो समय अनलाईन पत्रिकाका प्रधानसम्पादक रावललाई पुरस्कृत गर्ने निर्णय गरेको समाजका महासचिव श्यामकाजी डोटेलले जारी गर्नुभएको विज्ञप्तिमा जनाइएको छ ।
रेडियो नेपालबाट २०५७ सालबाट पत्रकारिता सुरू गर्नुभएका पत्रकार रावलले राष्ट्रिय सञ्चारमाध्यमहरु राजधानी दैनिक, नयाँ पत्रिका, ईमेज च्यानल र सगरमाथा टेलिभिजनमा जिल्ला सम्वाददाताको रुप कार्य गरेका थिए ।
यसैगरी, जिल्लाकै पहिलो रङ्गीन पत्रिका त्रिशूली खबर साप्ताहिकको संस्थापक सम्पादक तथा प्रकाशक समेत रहेर काम गरिसक्नु भएको छ । रावलले पत्रकारितासँगै नुवाकोट जिल्लामा रहेर नयाँ ढंगको होटल व्यवसाय समेत सञ्चालन गर्दै आउनु भएको छ । शुखद पाहुना घरका नामले परिचित रहेको उक्त होटल जिल्लामा उत्कृष्ट रहेको छ ।
यस्तै, नेपाल पत्रकार महासंघ बझाङका अध्यक्ष डिबी विष्टलाई पनि यस वर्षको ‘गोविन्द वियोगी विशेष पत्रकारिता पुरस्कार’बाट पुरस्कृत गरिने जनाएको छ । पत्रकार विष्ट बझाङबाट राजधानी दैनिकको जिल्ला सम्वाददाताको रुपमा कार्य गर्दै आईरहेका छन् ।पर्वतबाट प्रसारण हुने महिलाहरुद्वारा सञ्चालित सामुदायिक रेडियो ९५।२ मेगाहर्जलाई ‘गोविन्द वियोगी पत्रकारिता पुरस्कार’ बाट पुरस्कृत गरिने संस्थाले निर्णय गरेको छ ।
संस्थागत र व्यक्तिगतरुपमा प्रदान गरिने पुरस्कार राशी क्रमशस् २५ हजार एक र १५ हजार एक रुपैँया रहेको छ।संस्थाले वरिष्ठ पत्रकार युवराज घिमिरेलाई सम्पादक समाज नेपाल सम्मान २०८१ द्वारा सम्मानित गर्ने निर्णय गरेको छ ।संस्थाको संस्थापक स्व. गोविन्द वियोगीका धर्मपत्नी कृष्णवदन वैद्यलाई सम्मान गरिने जनाएको छ ।
नुवाकोटको शिवपुरी गाउँपालिका ७ सूर्यचौरस्थित संस्थाले आफ्नै भवनमा यहि माघ ५ गते शनिवारका दिन पुरस्कार र सम्मान हस्तान्तरण गरिने महासचिव डोटेलले जानकारी दिए । सम्पादक समाजमा प्रवुद्ध पत्रकारहरुको जमात रहेको छ ।
